2021 թվականի ինքնակառավարման մարմինների ընտրություններում Մառնեուլիի քաղաքապետի թեկնածու, գործող քաղաքապետ Քենան Օմարովը քաղաքացիներին խոստացել էր, որ առաջիկա չորս տարիներին Մառնեուլիի մունիցիպալիտետում կկատարվեն տարբեր մշակութային և սպորտային աշխատանքներ, այդ թվում՝ կիրականացվի Մառնեուլիի չորս համակցված մինի մարզադաշտերի վերականգնումը, որի համար տեղական բյուջեից կհատկացվի 123,4 հազար լարի։ Այս խոստման մասին գրված է «Վրացական երազանք»-ի հրապարակած Մառնեուլիի նախընտրական ծրագրում։

Այսօրվա դրությամբ, Մառնեուլիի չորս համակցված մինի մարզադաշտերի վերականգնումը չի իրականացվել, այսինքն` Մառնեուլիի քաղաքապետ Քենան Օմարովի խոստումը չի կատարվել։

Նշենք, որ այս նպատակի համար անգամ մրցույթ չի հայտարարվել. պետական ​​գնումների կայքում համապատասխան մրցույթ չի հայտնաբերվել։ Նշենք նաև, որ Մառնեուլիի մունիցիպալիտետի 2022 թվականի բյուջեում սպորտի զարգացման համար հատկացվել է 3799.0 հազար լարի, որից 2174.0 հազար լարին պետք է ծախսվեր մարզական օբյեկտների նորոգման, վերականգնման և շինարարության վրա (տե՛ս նկար 1):

Նկար 1․ աղբյուր՝ Մառնեուլիի մունիցիպալիտետի 2022 թվականի բյուջե

Ինչպես գրված է բյուջեի «Սպորտային օբյեկտների կահավորում, վերականգնում, կառուցում» ծրագրի մանրամասն նկարագրության մեջ, 2174.0 հազար լարի տրամադրվել է մունիցիպալիտետի գյուղերում 4 նոր մինի մարզադաշտերի կառուցմանը, իսկ Մառնեուլի քաղաքի չորս համակցված մինի-մարզադաշտերի վերականգնումն ընդհանրապես նշված չէ բյուջեում (տե՛ս նկար 2):

Նկար 2․ աղբյուր՝ Մառնեուլիի մունիցիպալիտետի 2022 թվականի բյուջե

2023 թվականի բյուջեում ներառված չի եղել նաև Մառնեուլիի չորս միավորված մինի մարզադաշտերի վերականգնումը։ 2023 թվականին Մառնեուլիի մունիցիպալիտետի սպորտի ոլորտի զարգացմանը հատկացված միջոցներից հատկացվել է 3459.0 հազար լարի մարզական օբյեկտների նորոգման, վերականգնման և կառուցման համար՝ դրանով իսկ ծրագրելով քաղաքապետարանի 3 գյուղերում մարզասրահների կառուցում (տե՛ս նկար 3): Այս դեպքում նույնպես Մառնեուլիում տեղակայված մինի մարզադաշտերի վերականգնում/կառուցում նախատեսված չէր։

Նկար 3․ աղբյուր՝ Մառնեուլիի մունիցիպալիտետի 2023 թվականի բյուջե

Նշենք, որ Մառնեուլիի մունիցիպալիտետի 2024 թվականի բյուջեով նախատեսվում է նաև մարզական օբյեկտների նորոգում, վերականգնում և կառուցում, ինչի համար հատկացվել է 2850.0 հազար լարի, և այս գումարով` առնվազն 6 նոր մարզադաշտերի կառուցում (տե՛ս նկար 4):

Ծրագրի բովանդակությունից հնարավոր չէ պարզել, թե որտեղ է նախատեսված 6 մինի մարզադաշտերի կառուցումը։ Այնուամենայնիվ, ուսումնասիրելով Մառնեուլիի քաղաքապետարանի կողմից Պետական ​​գնումների գործակալության կայքում հրապարակված մրցույթներն ու գնումները, «Ալիք Մեդիա»-ն այս անգամ էլ չկարողացավ գտնել Մառնեուլիում նախատեսված աշխատանքների համար հայտարարված էլեկտրոնային մրցույթ։

Նկար 4․ աղբյուր՝ Մառնեուլիի մունիցիպալիտետի 2024 թվականի բյուջե

Կիրականացվի՞ քաղաք Մառնեուլիում չորս միավորված մինի մարզադաշտերի վերականգնումը, հայտնի կդառնա 2025 թվականին, երբ հաստատվի Մառնեուլիի քաղաքապետարանի 2025 թվականի բյուջեի նախագիծը։ Այս փուլում քաղաքապետի խոստումը դեռ չի կատարվել։ «Ալիք Մեդիա»-ն կշարունակի վերահսկել քաղաքապետի տված խոստման կատարման ընթացքը և հետագայում ևս կանդրադառնա այս խնդրին։